Minga is wia jeda woas die Wiege der grossn Starkbierfestl, ganz vorn dro da Salvator vom Paulaner und  g’schmaggige Starkbiere vom Löwenbräu, Augustiner und andre Münchner Brauerein.

Seit 1780 werd jed’s Jahr im Frühjahr de Starkbierzeit in München ei’gleit und dann fangt die siasse Zeid von de Bockbiere der Münchner Brauereien o’. Die Begründer da Starkbierzeit warn damois, wia soit’s anders sei, die Mönche vom Paulaner Orden, die 1630 an Salvator kreiert hom, um eanan Hunga in da Fastenzeit z’ übabrüggn, die am Aschermittwoch o’fangt und bis Ostern dauad.

Da erste is da Löwenbräu am 25.02.2010 im Löwenbräu-Keller mit ‘m Triumphator und de „Damischen Ritter“. Bis 27.03.2010 werd do da Triumphator ausg’schenggt.

Ab’m 26.02.2010 foigt d’ Augustiner Brauerei mit’m Maximator im Alten Lagerkeller, wo’s bis zum 20.03.2010 aus ‘m Fassl ausg’schenggt werd.

S’ Highlight da Münchner Starkbierzeit is feile d’ Salvatorprobe am 04.03.2010 mit’m Lerchenberg Michael ois Fastenredner “Bruder Barnabas” und am Biedermann Fonse ois nei’n Autor und Regisseur vom Salvator-Singspiel und am Politiker Derbleck`n auf’m Nockherberg. Beim Paulaner fangt am 05.03.2010 die Starkbierzeit auf ‘m Nockherberg o’ und geht bis zum 21.03.2010.

Ned ganz so bekannt, aba imma an B’suach wert is da Starkbieranstich in da Perlacher Forschungsbrauerei, wo ma ab’m 05.03.2010 den warscheinle stärkst’n Doppelbock St. Jakobus probian ko’. Aba Obacht! 19% Stammwürze und 7,5 bis 8% Alkohol kannt’n as Hoam fahrn intressant macha’.

Ab’m 07.03.2009  griagst dann a’ no vom Hagn Wiggerl in seim Haidhauser Unionsbräu an Unimator z’ dringga.

Zum guadn Schluss kimmt dann no’s Hofbräuhaus, wo ma ab April 2010 an Maibock griagt.

Fotos: Bayerischer Brauerbund e. V.