Des Versal beschäftigt sich mit bairische Schimpfwörter, die i zwar alle kenn, aba die meistn scho lang nimma g’hert hob, und vui davo in d’ ländliche Umgebung g’hern. Auf’m Land werd hoid no ea Dialekt g’redt wia in da Stodt.

Da Herr Schuirat kimmt in´d Schui
und hört de Kinder zua beim Spui.
Er daschrickt und bleibt glei steh,
er ko nimma weidageh:
De schrein si o, so wuid und laut,
mit Ausdrück füa a Ganserlhaut:

“Du Depp, du Aff, du bläde Sau,
du Rindvieh, Arschloch, Hirnwauwau,
du Lalle, Ziefern, Hemadlenz,
du Bazi, Lackl, bläda Stenz,
du Blunzn, Krattla, Haberngoas,
du Facke, Drecksau, oide Loas.”

Da Herr Schuirat is ganz baff,
da schreit grod oana:”Oida Aff.”
Und weida gehts, des Schimpfa, Plärrn,
er beidlt si, kons nimma hörn:

“Du Mistviech, Gmoadepp, Grantlhuaba,
du Bauantrampe, depperts Luada,
du Doag-Aff, Ramme, du Schlawuzi,
du Lätschnbeni, Kruziwuzi,
du nixigs Bürschal, gscherter Lackl,
du oide Schäsn, gwamperts Fackl.”

“Jetzt werd´s dem Schuirat langsam z´bläd,
wo bleibt denn die Be-neh-mi-tät?”
Doch da gehts scho wieda weida,
jetzt woas er´s gwies: De wern ned gscheida.

“Du Biessgurn, Matz, du Flietscherl,
du Heigeign, gschlamperts Prietscherl,
du Grischperl, Dreckbär, Hodalump,
du Trampe, Lapp, du Waglhund,
du Duid-Aff, Siach, du bläda Hamme,
du Rossboinsammler, Nasnramme.”

Da… steht der Lehrer dieser Bande,
es is a Schand im ganzen Lande.
Da Schuirat sagt mit ernstem Ton:
“Herr Kollege wissn´s schon,
der Umgangston in Ihrer Klass
is ordinär und voller Hass.”
Da Lehra woas ned aus ned ei,
wos kunnt da Grund dafüa woi sei ?
“Mei” moant a ” i sags äh oiwei,

seids ned so bäs es blädn Deife,
es seids de Dümmsten ohne Zweife,
es Zipfe, Schissa, Hockableiba,
es Bauernfünfa, Facketreiba,
es Nasenbohra, Meiaufreissa,
es Deppn und es Hosenscheissa.

I konn redn so… vui… i… wui,
de ganz Erziehung huift ned vui.
De Krippen san so bläd, so gscherd,
drum werd so umananda plärrt.
Es is a Kreiz – es is a Graus,
wahrscheinlich liegts am Elternhaus.”

Foto: Thilo Duschner