Kirchheim – A paar tausend Bierflaschl hom am Dienstagnachmittag a grausams End gfundn, wei’s von am Getränkelaster auf da A99 an da Anschlussstelle Kirchheim auf ‘ d Fahrbahn g’foin sand. De Auffahrt war fünf Stund’ lang g’sperrt.

Laut Polizei hod der 56-jährige LKW-Fahrer aus Thüringen auf seim Laster etwa 1200 Tragl Bier glodn. Gega 14.30 Uhr woit er mit seim Sattelzug auf’ d A99 Richtung Nürnberg eifahrn. In da Rechtskurvn san die Biertragl ins Rutschen kemma. D’ Plane am Aufbau is grissn und rund 600 Tragl Bier san vom LKW auf’ d Strass kracht. A Großteil von de Bierflaschl hod des ned übalebt wei se’s G’nagg brocha hom und langsam und elendig im Strassngrobn vasiggat san.

De Aufräumarbeiten warn extrem aufwändig, wei de ganzn Freibierletschn scho anderswo untawegs warn und den Biersee ned so schnell aussauffa hom kenna…