Im September is wieda soweid, d’Wiesn fangt o’ und vom Münchner bis zum Saupreiss ziagt a jeder a Tracht o’. Da Haferlschuah g’head a dazua und is friaha in Bayern und in da ganzn Alpnregion eigentli ois Arbats- und Alldogsschuah gebräuchlich g’wesn. Es is wahrscheinle s’erfoigreichste Schuahmodell in Bayern und is zum festn’ Bestandteil vo vui Alpenländische Trachten woan. In Bayern sogt ma a Bundschuah dazua.

Haferlschuah san robuste Hoibschuah und hom an bequema Schnitt. Des war grod bei da Arbat a grossa Vorteil. De broade, vordare Front hod de Zeha guad g’schützt. Duach de Schifferlfoam hom de Zeha a nach obm ausweicha kenna. Duach de seitlichn Aussparunga an de Gnechl, is da Fuaß guad beweglich und de robustn Soin hom s Arbatn auf’m Woidbodn und auf schräge Bergwiesn bequem und sicha g’macht.

S’ gibt mehrare Theorien wia da Haferlschuah zu seim Nama kemma is. Des Wort kannt aus’m Englisch’n kemma, und zwar vo half. Es soin angeblich englische Sommafrischla g’wesn sei, de wo zu dem Schuah oafach half shoe (Hoibschuah) xogt hom. Wei de Haferlschuah broad und schüsslförmig ausschaung, kennt des Wort aba a vom Bairischn Haferl ab’gleit sei.

Wia a imma, I wer auf jed’n Fall meine Haferlschuah jetzad langsam wieda auf Hochglanz polian, damit I auf da Wiesn wieda guad aus’grüsst bin.