Im Jahr 1812 erlaubte König Max I. Joseph den Brauern Münchens den Ausschank an ihren Lagerkellern – und begründete somit unser bayerisches Nationalgut, den Biergarten.

Der Nicht-Bayer, oda wia mia sogn – da Zuagroaste schauggd oft recht bled daher wenn a im Biergarten des Treiben auf de Nachbartisch’ beobacht’. Da hogga Einheimische mit eanare Brotzeit-Keabal, hoin sich a Maß Bier am Ausschank und bagga dann gmiatlich auf ihrer eigna Tischdegga ihr mitbrocht’s Essen aus. Kaas, Wuaschd, Butta, Salod, Brezn und Essig-Gurggal – es feahd se an nix. Und des, obwoi’s am Standl nem dro ois des kaffa konnsd – Und da Bedienung is’ erst recht wuaschd.

Wos in jeda andan Wirtschaft den sichan Rausschmiss bedeut’ is in de Münchner Biergärten Alltag. Des sogenannte Brotzeitrecht hod a lange Tradition. Es is genauso oid wia da Biergarten selba. Und der feiad jetzad Gebuatsdog – 200 Jahr’ werd er oid. Warum aba da bayerische König Max I. Joseph genau am 4. Januar 1812 duach a allerhöchstes Reskript erlaubt hod, dass de Brauereien ihr Bier direkt am Ort da Herstellung ausschengga derfa, werd woi sei Geheimnis bleim.

Das Münchner Tourismusamt hod 2012 des Motto “200 Jahre Biergarten” aufg’stellt und gemeinsam mit’m Tourismusverband München-Oberbayern a ganzjährig’s Programm dazua. Original Münchner Schäfflertänze und a Sonderausstellung im Bier- und Oktoberfestmuseum san a mit dabei. Die Biergartenbetreiber wern eigene Veranstaltungen zum Jubiläum macha. Richtig feian wer ma aba erst in a paar Monat’, wenn ma in München wieda Lederhosn Weda hom…